នៅពីក្រោយភាពលេចធ្លោម្ចាស់មេដាយរូបវិទ្យាទ្វីបអាស៊ី ប្រាក់ ស៊ីវហួ ជាយុវតីឆ្នើម
វាស្ទើរមិនទាន់រលត់កំសួលចិត្តរីករាយផង ដែលយុវជនខ្មែរ២នាក់បានបង្កើតមោទនភាពសម្រាប់ប្រជាជាតិកម្ពុជាគឺការ ឈ្នះមេដាយកិត្តិយស និង មេដាយប្រាក់ នៅការប្រកួតរូបវិទ្យាអូឡាំព្យាដអន្តរជាតិទ្វីបអាស៊ីនៅទីក្រុង Hangzhou ខេត្ត Zhejiang ប្រទេសចិន ថ្មីៗ Sabay ណែនាំមិត្តអ្នកឲ្យស្គាល់ម្ចាស់មេដាយប្រាក់ ហេង សូវីរ៉ូ រួចហើយ កាលសប្ដាហ៍មុន តែថ្ងៃនេះសូមមកជួបម្ចាស់មេដាយកិត្តិយសអន្តរជាតិទ្វីបអាស៊ី វិញម្ដង។
កើតក្នុងគ្រួសារអាជីវករស្រុកមង្គលបុរីខេត្តបន្ទាយមានជ័យ នេះមិនជាលើកទី១ទេ ដែលកញ្ញា ប្រាក់ ស៊ីវហួ បានបង្កើតសមិទ្ធផលឲ្យកម្ពុជា។ សិស្សវិទ្យាល័យមង្គលបុរីខេត្តបន្ទាយមានជ័យរូបនេះ ធ្លាប់ឈ្នះមេដាយបន្តបន្ទាប់ លើឆាកប្រកួតចំណេះវិជ្ជា ទាំងកម្រិតអន្តរជាតិទូទាំងពិភពលោក និងទូទាំងអាស៊ី។
ប្រាក់ ស៊ីវហួ (ស្ដាំ) និង ហេង សូវីរ៉ូ (ឆ្វេង) កាលឆ្នាំមេដាយអូឡាំព្យាដទ្វីបអាស៊ីនៅចិន
កាលទី៩ឆ្នាំ ២០១២ ស៊ីហួ បានឈ្នះមេដាយប្រាក់ ក្នុងការប្រលងអ្នកវិទ្យាសាស្ត្រវ័យក្មេងនៅ អ៊ីរ៉ង់។ កាលនោះ យុវជនកម្ពុជាដែលទៅចូលរួមឈ្នះមេដាយគ្រប់គ្នា គឺប្រាក់៥និងសំរឹទ្ធ១។
រីឯកាប្រលងរូបវិទ្យាអូឡាំព្យាដអន្តរជាតិលើកទី ៤៥នៅ កាហ្សាក់ស្ថាន កាលឆ្នាំ២០១៤ ដែលមានសិស្សប្រទេសនានាជុំវិញពិភពលោកចូលរួម ស៊ីវហួ វិលវិញជាមួយមេដាយកិត្តិយស សម្រាប់កម្ពុជា មុនឈ្នះមេដាយអូឡាំព្យាដអន្តរជាតិទ្វីបអាស៊ី កាលពីកន្លះខែមុន។
ប្រាក់ ស៊ីវហួ កាលទៅប្រកួតរូបវិទ្យាអូឡាំព្យាដអន្តរជាតិនៅ កាហ្សាក់ស្ថាន ឆ្នាំមុន
ប្រាក់ ស៊ីវហួ ថ្លែងពីការឈ្នះមេដាយអូឡាំព្យាដទ្វីបអាស៊ីកាលពីពេលថ្មីៗថា៖ «សប្បាយខ្លាំងមែនទែន គឺជាមោទនភាពខ្មែរយើង ព្រោះខ្មែរយើងទៅមិនធ្លាប់ជាប់ទេ ទើបតែឆ្នាំនេះ យើងរំភើបមែនទែន វាជាការប្រកួតប្រជែងដ៏ខ្លាំង»។
ក្រោយត្រលប់ពីប្រទេសចិន គឺទីដែលឈ្នះមេដាយរូបវិទ្យាប្រចាំទ្វីប ស៊ីវ ហួ និង ហេង ស៊ីវីរ៉ូ ដែលជាប់មេដាយប្រាក់ទីនោះ បានទទួលរង្វាន់ម្នាក់៣ពាន់ដុល្លារ ពីប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីហ៊ុន សែន។
បើនិយាយពីការប្រលងសិស្សពូកែរូបវិទ្យាទូទាំងប្រទេស ស៊ីវហួ ដែលកាលថ្នាក់ទី ១១ ចំណាត់ថ្នាក់ប្រចាំខែវិលចុះឡើងៗ ពីចន្លោះលេខ១ទៅ៥ ធ្លាប់ជាប់លេខ២កាលរៀនទី៩កាល២០១៤។ សិស្សពូកកែរូបវិទ្យាទូទាំងប្រទេសឆ្នាំ២០១៥វិញ សីវហួ ជាប់លេខ៣។
នាងបង្ហាញតិចនិកពិសេសនៃការរូបវិទ្យាពូកែថា សំខាន់ត្រូវយល់មេរៀន បាតុភូតលំហាត់ និងប្រើរូបមន្តឲ្យត្រឹមត្រូវ។ ស៊ីវហួ ថាសម្រាប់នាងរូបវិទ្យាគឺពាក់ព័ន្ធនឹងការគិតច្រើន ហើយថាកុំព្យាយាមតែទន្ទេញរូបមន្ត តែត្រូវអនុវត្តរូបមន្តឲ្យចំ។
អ្វីដែលសំខាន់ពេលនេះ ស៊ីវហួ កំពុងរៀនត្រៀមនៅសាកលវិទ្យាល័យភូមិន្ទភ្នំពេញ ដើម្បីឆ្ពោះទៅការប្រកួតរូបវិទ្យាអន្តរជាតិ នៅទីក្រុង មុមបៃ ប្រទេសឥណ្ឌា ខែកក្កដាខាងមុខ។ ទន្ទឹមនឹងការប្រលងបាក់ឌុបចូលមកដល់ខែ សីហា ខាងមុខ សិស្សមកពីខេត្តជាប់ប្រទេសថៃរូបនេះបាន ទទួលដំណឹងជាប់អាហារូបករណ៍ UWC ជាស្រេច គឺនឹងត្រូវចេញទៅរៀនថ្នាក់បាក់ឌុបអន្តរជាតិនៅសិង្ហបុរីរយៈពេល២ឆ្នាំ មុននឹងអាចដាក់ពាក្យទៅសិក្សាអាហារូបករណ៍នៅសាកលវិទ្យាល័យល្បីៗមួយចំនួនលើលោក៕
Facebook Comments Plugin Enhanced by KB Tricks
Blogger Tutorials
0 comments:
Post a Comment