ដាំដើមឈើជាង៦សែនដើមក្នុងមួយថ្ងៃ បំបែកកំណត់ត្រា Guinness
កាលពីថ្ងៃសៅរ៍កន្លងទៅ ប្រជាជនអេក្វាឌ័រប្រមាណជិត ៤៥០០០នាក់ បានចូលរួមដាំដើមឈើ ៦៤៧២៥០ដើម លើផ្ទៃដី ២០០០ហិចតា បំបែកកំណត់ត្រាពិភពលោករបស់ស្ថាប័ន Guinness។ កំណត់ត្រានេះ ត្រូវបានមនុស្សជាច្រើននៅលើពិភពលោក ចាត់ទុកថាមានតម្លៃបំផុតសម្រាប់ភពផែនដី។
ប្រធានាធិបតីប្រទេសអេក្វាឌ័រ លោក Rafael Correa បានប្រកាសថា ប្រទេសអេក្វាឌ័របានបំបែកកំណត់ត្រាពិភពលោកសម្រាប់ការស្តាព្រៃឈើឡើងវិញ ដោយមានមនុស្សរាប់ពាន់នាក់ចូលរួមដាំដើមឈើ ៦៤៧២៥០ដើម ក្នុងរយៈពេលត្រឹមមួយថ្ងៃប៉ុណ្ណោះ។
ប្រធានាធិបតីស្រលាញ់ព្រៃឈើរូបនេះ បាននិយាយកាលពីថ្ងៃសៅរ៍ថា “ខ្ញុំទើបទទួលបានដំណឹងថា យើងបានបំបែកកំណត់ត្រាពិភពលោក Guinness សម្រាប់ការស្តាព្រៃឈើឡើងវិញ”។ លោកបានបន្តទៀតថា កូនឈើជាច្រើនប្រភេទត្រូវបានដាំឡើងវិញ ហើយកិច្ចខិតខំប្រឹងប្រែងស្តាព្រៃឈើនេះនឹងធ្វើឡើងពាសពេញប្រទេសអេក្វាឌ័រ។
លោក Rafael Correa កំពុងដាំដើមឈើ
រដ្ឋមន្ត្រីក្រសួងបរិស្ថានលោក Lorena Tapia បានសរសេរនៅលើ Twitter ថា មនុស្ស ៤៤៨៨៣នាក់ បានចូលរួមដាំដើមឈើលើផ្ទៃដី២០០០ហិចតា។ ចំណែកស្ថាប័ន Guinness បានបញ្ជាក់ថា កំណត់ត្រាចាស់កាលពីឆ្នាំមុន ធ្វើបានដោយក្រុមអ្នកដាំដើមឈើនៅក្នុងប្រទេសហ្វីលីពីន។
ចាប់តាំងពីលោក Rafael Correa ឡើងកាន់តំណែងជាប្រធានាធិបតី ប្រទេសអេក្វាឌ័របានព្យាយាមកាត់បន្ថយការកាប់បំផ្លាញព្រៃឈើ។ ព្រៃឈើក្នុងប្រទេសនេះ បានធ្លាក់ចុះពី ៩២០០០ហិចតា ក្នុងចន្លោះឆ្នាំ១៩៩០ ទៅ២០០០ មកត្រឹម ៤៧០០០ហិចតា ចាប់ពីឆ្នាំ២០១២ មក។ ប្រទេសនេះ នឹងខិតខំដាំដើមឈើឲ្យកើនដល់ ៥០០០០ហិចតាវិញ ត្រឹមឆ្នាំ២០១៧៕
Facebook Comments Plugin Enhanced by KB Tricks
Blogger Tutorials
0 comments:
Post a Comment