សិស្ស៣នាក់ និងអ្នកលក់ប្រហិតចៀនម្នាក់ រងរបួស ដោយសារផ្ទុះកំប៉ុងហ្គាស
នារីខ្មែរ
Thursday 04 June 2015 - 2:47 pm - ផ្សាយក្នុងផ្នែក ៖ ព័ត៌មានទូទៅ
កំពង់ឆ្នាំង៖ សិស្សសាលារៀនថ្នាក់ទី១២ចំនួន៣នាក់ និងអ្នកលក់ប្រហិតចៀនក្នុងសាលាម្នាក់ បានរងរបួសឆេះរលាកពេញផ្ទៃមុខ និង ដងខ្លួន បន្ទាប់ពីកំប៉ុងហ្គាស់បានផ្ទុះចេញពីចង្ក្រាន ខណៈដែលកំពុងបើកចំអិនប្រហិត។
ករណីផ្ទុះកំប៉ុងហ្គាសចេញពីចង្ក្រានខាងលើនេះ បានកើតឡើង កាលពីវេលាម៉ោង៣និង៣០នាទី ថ្ងៃទី០៣ ខែមិថុនា ឆ្នាំ២០១៥ ស្ថិតនៅក្នុងបរិវេណវិទ្យាល័យរលាប្អៀរជើងក្នុងពង្រ ស្រុករលាប្អៀរ ខេត្តកំពង់ឆ្នាំង។
បើតាមអ្នកគ្រូរបស់សិស្សសាលានោះ បានឲ្យដឹងថានៅមុនពេលកើតហេតុ ស្ត្រីអ្នកលក់ប្រហិតបានបើកចង្ក្រានហ្គាសចំអិនប្រហិតដើម្បីលក់ឲ្យសិស្សដែលចោមរោមឈរទិញនៅជុំវិញគ្រែលក់ ក្នុងពេលដែលកំពុងចំអិនស្រាប់តែកំប៉ុហ្គាស់បានផ្ទុះឡើង និង មានអណ្តាតភ្លើងឆាបឆេះឡើង បណ្តាលឲ្យ ខ្ទាតខ្ទះខ្លាញ់ ជះឡើងលើ ត្រូវចំស្ត្រីអ្នកលក់១នាក់ និង សិស្សសាលាចំនួន៣នាក់តែម្តង។
ជនរងគ្រោះ ១.ឈ្មោះសៅ ស៊ីថន ភេទស្រី អាយុ២៥ឆ្នាំ រស់នៅភូមិថ្មី ឃុំពង្រ ស្រុករលាប្អៀរ ជាអ្នកលក់ប្រហិតចៀននៅក្នុងសាលា។ ២.ឈ្មោះ គឹម កញ្ចារ៉ាត់ ភេទស្រី អាយុ១៧ឆ្នាំ ៣.ឈ្មោះកុយ សុណែត ភេទស្រី អាយុ១៨ឆ្នាំ និង៤.ឈ្មោះចាន់ សុភាស់ ភេទស្រី ទាំង៣នាក់ជាសិស្សរៀនថ្នាក់ទី១២A នៃវិទ្យាល័យរលាប្អៀរជើង៕
Facebook Comments Plugin Enhanced by KB Tricks
Blogger Tutorials
0 comments:
Post a Comment