រាជធានីភ្នំពេញ ៖ ចាប់តាំងពីពាក់កណ្ដាលឆ្នាំ២០១៤ រហូតមកដល់ពេលបច្ចុប្បន្ននេះ បំរែបំរួលប្រាក់រៀលខ្មែរ ធៀបនឹងដុល្លារអាមេរិក ឃើញថាប្រែប្រួលតិចតួច និងមានតម្លៃទាបជាងឆ្នាំមុនៗ ។ ជារៀងរាល់ឆ្នាំប្រាក់រៀលប្រែប្រួលឡើងថ្លៃ នៅអំឡុងពេលដើមឆ្នាំ និងចុងឆ្នាំ ប៉ុន្តែសម្រាប់ចុងឆ្នាំ ២០១៤ និងដើមឆ្នាំ២០១៥នេះ មិនមានអ្វីគួរឲ្យកត់សម្គាល់ទេ គឺប្រែប្រួលតិចតួចប៉ុណ្ណោះ ស្ថិតក្នុងរង្វង់លើ៤.០០០រៀល តិចតួចក្នុង១ដុល្លារអាមេរិក។
តាមរបាយការណ៍ដែលចុះផ្សាយដោយធនាគារជាតិនៃកម្ពុជាក៏បានបង្ហាញដែរថា ប្រាក់រៀលកាលពីដើមឆ្នាំ ២០១៤ មានតម្លៃបន្ដិច គឺក្រោម៤.០០០រៀលក្នុង១ដុល្លារសហរដ្ឋអាមេរិក រហូតដល់ខែមីនា ឆ្នាំ២០១៤ ប្រាក់រៀលនៅតែរក្សាតម្លៃបានក្រោម៤.០០០រៀលក្នុង១ដុល្លារអាមេរិកដដែល។ ប៉ុន្តែចូលដល់ខែមេសា រហូតដល់ដំណាច់ឆ្នាំ២០១៤ ប្រាក់រៀលចាប់ផ្ដើមធ្លាក់ថ្លៃបន្តិចម្ដងៗ ហើយបានកើនឡើងបន្តិចវិញ នៅដើមឆ្នាំ២០១៥ តែបើធៀបនឹងឆ្នាំ២០១៤ តម្លៃប្រាក់រៀលនៅមានកម្រិតទាបជាង ។
អ្នកជំនាញនៃវិស័យធនាគារ និងហិរញ្ញវត្ថុ បានបញ្ជាក់ដែរថា ការប្រែប្រួលតម្លៃប្រាក់រៀលក្នុងរង្វង់ប៉ុណ្ណេះ វាមិនបានធ្វើឲ្យមានឥទ្ធិពលធ្ងន់ធ្ងរដល់ប្រាក់រៀលយើងទេ ព្រោះយើងបានរក្សាវាអស់រយៈពេលជាង១០ឆ្នាំមកហើយ គឺនៅរង្វង់ក្រោម៤.០០០ និងលើតិចតួចប៉ុណ្ណោះក្នុង១ដុល្លារអាមេរិក ។
យោងតាមការបញ្ជាក់ពីធនាគារជាតិនៃកម្ពុជា ក៏ដូចជាធនាគារដទៃទៀតនៅកម្ពុជា ប្រាក់រៀលតែងប្រែប្រួលទៅតាមតម្រូវការរបស់វា ជាក់ស្ដែងនៅចុងឆ្នាំ និងដើមឆ្នាំ តម្រូវការប្រាក់រៀលយកទៅបង់ពន្ធអាជីវកម្មផ្សេងៗ ដែលជាហេតុធ្វើឲ្យប្រាក់រៀលចាប់ផ្ដើមមានតម្លៃ ។
គួរបញ្ជាក់ថា នៅចុងខែឧសភា ២០១៥ នេះ អត្រាទិញ-លក់ ប្រាក់រៀលធៀបនឹងប្រាក់ដុល្លារ គឺមានតម្លៃជិត៤.១០០រៀលក្នុង១ដុល្លារ ដែលកាលពីដើមឆ្នាំ២០១៥ ស្ថិតក្នុងរង្វង់៤០៥០រៀលក្នុង១ដុល្លារអាមេរិក ៕
Facebook Comments Plugin Enhanced by KB Tricks
Blogger Tutorials
0 comments:
Post a Comment